ਨਸ਼ਾ ਤਸਕਰੀ ਲਈ ਨਾਬਾਲਗ ਦੀ ਵਰਤੋਂ, ਅੱਧਾ ਕਿੱਲੋ ਚਿੱਟਾ ਬਰਾਮਦ

15/08/2026 | Public Times Bureau | Panjab

ਥਾਣਾ ਨਥਾਣਾ ਪੁਲਿਸ ਨੇ ਇਕ ਨਾਬਾਲਗ ਨੂੰ ਅੱਧਾ ਕਿੱਲੋ ਚਿੱਟੇ ਸਮੇਤ ਕਾਬੂ ਕਰਕੇ ਬਾਲ ਸੁਧਾਰ ਘਰ ਫ਼ਰੀਦਕੋਟ ਭੇਜ ਦਿੱਤਾ ਹੈ। ਪੁਲਿਸ ਮੁਤਾਬਕ ਨਾਬਾਲਗ ਨੂੰ ਨਸ਼ੇ ਦੀ ਖੇਪ ਲਿਆਉਣ ਲਈ ਵਰਤਿਆ ਜਾ ਰਿਹਾ ਸੀ। ਪੁਲਿਸ ਅਧਿਕਾਰੀਆਂ ਅਨੁਸਾਰ ਜੰਡਾਵਾਲਾ ਰੋਡ ’ਤੇ ਚੈਕਿੰਗ ਦੌਰਾਨ ਨਾਬਾਲਗ ਦੇ ਮੋਢੇ ’ਤੇ ਟੰਗੇ ਬੈਗ ਦੀ ਤਲਾਸ਼ੀ ਲਈ ਗਈ, ਜਿਸ ’ਚੋਂ ਅੱਧਾ ਕਿੱਲੋ ਚਿੱਟਾ ਬਰਾਮਦ ਹੋਇਆ। ਪੁੱਛਗਿੱਛ ’ਚ ਉਸ ਨੇ ਦੱਸਿਆ ਕਿ ਬਠਿੰਡਾ ਦਾ ਇਕ ਵਿਅਕਤੀ ਉਸ ਨੂੰ ਜਲਾਲਾਬਾਦ ਤੇ ਫ਼ਿਰੋਜ਼ਪੁਰ ਇਲਾਕਿਆਂ ਤੋਂ ਨਸ਼ੇ ਦੀ ਖੇਪ ਲਿਆਉਣ ਲਈ ਭੇਜਦਾ ਸੀ।

ਉਹ ਪਹਿਲਾਂ ਵੀ ਦੋ ਵਾਰ ਖੇਪ ਪਹੁੰਚਾ ਚੁੱਕਾ ਹੈ ਅਤੇ ਹਰ ਖੇਪ ਬਦਲੇ ਉਸ ਨੂੰ 2 ਤੋਂ 3 ਹਜ਼ਾਰ ਰੁਪਏ ਮਿਲਦੇ ਸਨ। ਪੁਲਿਸ ਹੁਣ ਉਸ ਮੁੱਖ ਮੁਲਜ਼ਮ ਦੀ ਭਾਲ ਕਰ ਰਹੀ ਹੈ, ਜਿਸ ’ਤੇ ਪਹਿਲਾਂ ਕਤਲ ਦੀ ਕੋਸ਼ਿਸ਼ ਦਾ ਮਾਮਲਾ ਦਰਜ ਹੋਣ ਦੀ ਗੱਲ ਕਹੀ ਗਈ ਹੈ। ਉਸ ਦੀ ਗ੍ਰਿਫ਼ਤਾਰੀ ਲਈ ਛਾਪੇਮਾਰੀ ਜਾਰੀ ਹੈ। ਜ਼ਿਕਰਯੋਗ ਹੈ ਕਿ ਪੰਜਾਬੀ ਜਾਗਰਣ ਨੇ 20 ਜੂਨ ਨੂੰ ਨਸ਼ਾ ਤਸਕਰੀ ’ਚ ਨੌਜਵਾਨਾਂ ਨੂੰ ਡਲਿਵਰੀ ਲਈ ਵਰਤੇ ਜਾਣ ਸਬੰਧੀ ਖ਼ਬਰ ਪ੍ਰਕਾਸ਼ਿਤ ਕੀਤੀ ਸੀ।

Use Of A Minor For Drug Trafficking Search For The Prime Accused