iPhone 14 Pro ਦੀ ਥਾਂ ਮਿਲਿਆ ਦਾੜ੍ਹੀ ਦਾ ਤੇਲ, ਫਲਿੱਪਕਾਰਟ ਨੂੰ ਗਾਹਕ ਨੂੰ 1.81 ਲੱਖ ਰੁਪਏ ਵਾਪਸ ਕਰਨ ਦਾ ਹੁਕਮ
24/07/2026 | Public Times Bureau | Panjabਮੁੰਬਈ ਵਿੱਚ ਆਨਲਾਈਨ ਸ਼ਾਪਿੰਗ ਦੌਰਾਨ ਹੋਈ ਧੋਖਾਧੜੀ ਦੇ ਮਾਮਲੇ ਵਿੱਚ ਖਪਤਕਾਰ ਕਮਿਸ਼ਨ ਨੇ ਫਲਿੱਪਕਾਰਟ ਅਤੇ ਸੇਲਰ ਨੂੰ ਗਾਹਕ ਦੇ ਹੱਕ ਵਿੱਚ ਫੈਸਲਾ ਸੁਣਾਇਆ ਹੈ। ਮੁੰਬਈ ਸਬ-ਅਰਬਨ ਡਿਸਟ੍ਰਿਕਟ ਕੰਜ਼ਿਊਮਰ ਡਿਸਪਿਊਟਸ ਰਿਡ੍ਰੈਸਲ ਕਮਿਸ਼ਨ ਨੇ ਦੋਵਾਂ ਨੂੰ ਗਾਹਕ ਨੂੰ 1.81 ਲੱਖ ਰੁਪਏ ਤੋਂ ਵੱਧ ਦੀ ਰਕਮ ਅਦਾ ਕਰਨ ਦਾ ਹੁਕਮ ਦਿੱਤਾ ਹੈ। ਮਾਮਲਾ ਮੁੰਬਈ ਦੇ ਪਵਈ ਇਲਾਕੇ ਦਾ ਹੈ, ਜਿੱਥੇ ਇੱਕ ਗਾਹਕ ਨੇ 22 ਅਪ੍ਰੈਲ 2023 ਨੂੰ ਫਲਿੱਪਕਾਰਟ ਤੋਂ 1,11,793 ਰੁਪਏ ਵਿੱਚ Apple iPhone 14 Pro ਖਰੀਦਿਆ ਸੀ। ਗਾਹਕ ਦੇ ਅਨੁਸਾਰ, ਚਾਰਜਰ ਅਤੇ ਕਵਰ ਤਾਂ ਮਿਲ ਗਏ, ਪਰ ਮੁੱਖ ਪਾਰਸਲ ਖੋਲ੍ਹਣ 'ਤੇ ਮਹਿੰਗੇ ਫੋਨ ਦੀ ਬਜਾਏ ਉਸ ਵਿੱਚ ਦਾੜ੍ਹੀ ਵਧਾਉਣ ਵਾਲਾ ਤੇਲ ਅਤੇ ਪੈਕਿੰਗ ਸਮੱਗਰੀ ਮਿਲੀ।
ਗਾਹਕ ਨੇ ਇਸ ਸਬੰਧੀ ਫਲਿੱਪਕਾਰਟ ਨਾਲ ਕਈ ਵਾਰ ਸੰਪਰਕ ਕੀਤਾ ਅਤੇ ਲੋੜੀਂਦੇ ਦਸਤਾਵੇਜ਼ ਵੀ ਦਿੱਤੇ, ਪਰ ਕੰਪਨੀ ਵੱਲੋਂ ਨਾ ਰਿਫੰਡ ਕੀਤਾ ਗਿਆ ਅਤੇ ਨਾ ਹੀ ਪ੍ਰੋਡਕਟ ਬਦਲਿਆ ਗਿਆ। ਕਮਿਸ਼ਨ ਨੇ ਇਸ ਨੂੰ ਸੇਵਾ ਵਿੱਚ ਘਾਟ ਅਤੇ ਗਲਤ ਵਪਾਰਕ ਵਿਵਹਾਰ ਕਰਾਰ ਦਿੱਤਾ। ਕਮਿਸ਼ਨ ਨੇ ਕਿਹਾ ਕਿ ਈ-ਕਾਮਰਸ ਪਲੇਟਫਾਰਮ ਸਿਰਫ਼ ਵਿਕਰੀ ਕਰਵਾਉਣ ਤੋਂ ਬਾਅਦ ਆਪਣੀ ਜ਼ਿੰਮੇਵਾਰੀ ਤੋਂ ਪਿੱਛੇ ਨਹੀਂ ਹਟ ਸਕਦਾ। ਗਲਤ ਪ੍ਰੋਡਕਟ ਦੀ ਡਿਲੀਵਰੀ, ਸ਼ਿਕਾਇਤ ਦਾ ਹੱਲ ਨਾ ਕਰਨਾ ਅਤੇ ਰਿਫੰਡ ਨਾ ਦੇਣਾ ਕੰਪਨੀ ਅਤੇ ਸੇਲਰ ਦੋਵਾਂ ਦੀ ਜ਼ਿੰਮੇਵਾਰੀ ਬਣਦੀ ਹੈ।
ਹੁਕਮ ਮੁਤਾਬਕ ਗਾਹਕ ਨੂੰ 1,11,793 ਰੁਪਏ ਦੀ ਮੂਲ ਰਕਮ 'ਤੇ 9 ਫੀਸਦੀ ਸਾਲਾਨਾ ਵਿਆਜ, 50,000 ਰੁਪਏ ਮਾਨਸਿਕ ਪਰੇਸ਼ਾਨੀ ਲਈ ਮੁਆਵਜ਼ਾ ਅਤੇ 20,000 ਰੁਪਏ ਕਾਨੂੰਨੀ ਖਰਚ ਵਜੋਂ ਦਿੱਤੇ ਜਾਣਗੇ। ਇਹ ਰਕਮ 45 ਦਿਨਾਂ ਦੇ ਅੰਦਰ ਅਦਾ ਕਰਨੀ ਹੋਵੇਗੀ। ਇਸ ਮਾਮਲੇ ਵਿੱਚ Apple India ਨੂੰ ਰਾਹਤ ਮਿਲੀ ਹੈ। ਕਮਿਸ਼ਨ ਨੇ ਕੰਪਨੀ ਦੀ ਇਹ ਦਲੀਲ ਸਵੀਕਾਰ ਕਰ ਲਈ ਕਿ ਵਿਕਰੀ ਸੁਤੰਤਰ ਡੀਲਰਾਂ ਰਾਹੀਂ ਹੋਈ ਸੀ ਅਤੇ ਗਲਤ ਡਿਲੀਵਰੀ ਲਈ ਨਿਰਮਾਤਾ ਨੂੰ ਜ਼ਿੰਮੇਵਾਰ ਠਹਿਰਾਉਣ ਦਾ ਕੋਈ ਸਬੂਤ ਨਹੀਂ ਹੈ।
Beard Oil Received Instead Of Iphone 14 Pro Flipkart Ordered To Refund 1 81 Lakh To Customer
RSS FEED